***
Երևի մարդկանց ես խանգարում եմ երջանիկ լինել...
Այլապես, ինչու՞ այդպես հեշտությամբ են թողնում-գնում,
Էլ երբեք-երբեք ետ չդառնալու անխիղճ միտումով,
Չմտածելով,- երջանկությունը գալիս-մնում է միա՛յն նրանց մոտ,
Ովքեր իրե՜նք են շռայլ լինում... երջանկացնելով...

Ռ.Խաստյան 21.03.2022

ՕՐՎԱ ՏԵՆԴ


Ասես, բացել են հսկա մի ծորակ
Որից վազում է շատ ծորուն մի ցավ,
Ծնկից վերև չեն ծովերն աշխարհի,
Բայց ջրհեղե՛ղ է ցավից ազգային...


Եվ յուրաքանչյուր առավոտ լուսո
Օծման ես սպասում ջրերում հուսո,
Հիշելով զուլալ աղբյուրը հեռվի,
Ուր երգեհոն էր կարկաչը առվի...


Սրտիդ ես սաստում, որ չհավատաս,
Միտքդ ես կողպում, որ չհասկանաս,-
Իրականությու՛ն, ճահճացած հեղեղ,
Ինչու՞ ես սպանում եզակի մի ցեղ...

Ռ.Խաստյան

***
Գիշերը՝ հոգեթով,
Քաղաքում նստած երազում է...
Աչքեր ունի աստղե,
Եվ երկար մազեր...
Նա անրջային երգեհոն ունի
Սերն է գովերգում
Նա ամեն գիշեր։

Վան Կարնո
Երևան 02.02.2022