Աստվածհայտնություն

Գարնանային արեւ ծագեց,
Ծագումն աստվածային է,
Գարնան շնչով ծառը ծաղկեց.
Ծաղկումն աստվածային է:
Ծաղկից առաջ բողբոջ կապեց,
Բողբոջն աստվածային է,
Ծառն հարսնացավ ու զարդարվեց.
Զուգվելն աստվածային է:
Հետո ծառը պտուղ առավ,
Պտուղն աստվածային է,
Կորիզվեց ու ամփոփ դառավ,
Կորիզն աստվածային է:
Աստղերն անհուն տվին նրան,
Անհունն աստվածային է,
Երկինքները իջան վրան.
Իջնելն աստվածային է:
Գարնանային արեւ ծագեց,
Ծագումն աստվածային է,
Գարնան շնչով ծառը ծաղկեց.
Ծաղկումն աստվածային է:

Դեպի քեզ

Ես գիտեի, ինչ էլ լինի,
Պիտի դառնամ դեպի Քեզ,
Ինչ խաղեր էլ բախտը հինի,
Պիտի դառնամ դեպի Քեզ:
Թե ինձ տրվի լալով ժպտալ,
Ձայնի ցավով լինել ծպտյալ,
Մաքրվելով՝ այսպես, այնպես,
Պիտի դառնամ դեպի Քեզ:
Գագաթներից ժայթքող հուրը–
Պիտի դառնա դեպի Քեզ,
Ամպի կաթիլ–կաթիլ համբույրը
Պիտի դառնա դեպի Քեզ:
Հոգուց հոգի կարոտն հոսող
Պիտի դառնա դեպի Քեզ,
Երկինք ելած հավքը խոսող
Պիտի դառնա դեպի Քեզ: