ՀԻՆ ԵՐԳ

Չեմ հարբելու այսուհետեւ–
Ուշ է - էլ ոչ մի մաղձ,
Պիտի ապրեմ` պարզ ու թեթեւ,
Ու նվիրվեմ - կանանց։

Ե՞րբ էր - ձեռքս բաժակ առա,
Ու ըմպեցի մի քիչ.
Ա~յ քեզ հրաշք բաժանարար–
Ինձնից մնաց - Ոչինչ։

Բաժանվեցի երկու մասի,–
Մեծ Ոչինչներ - դատարկ,
Խմողների Բարձր Դասին,
Անե~ծք, տղերք - ու փառք։

Չեմ հարբելու այսուհետեւ,
Ոչ մի կաթիլ - սեւ մաղձ,
Ապրելու եմ պարզ ու թեթեւ,
Օ~, Տե~ր – փրկի~ր կանանց։

Ո~ւշ է, տղա~, էլ ո՛չ մի մաղձ–

Հե՛րն անիծած – կանանց:

ԿԱՐՈՏ

Կարոտը Անուն չունի:–
- Անունդ ի՞նչ է, կարո՛տ,
Օ~, հանկարծ Աստված չանի
Անունով ելնես, գաս մոտ։

Մոտ արի, բաց է դուռս,
Լավ շոյվիր, շնավարի,
Բացում եմ նաեւ բուռս,
Տե՛ս, ի՞նչ կա – կե՛ր, չսառի:

Մի խորշիր, սիրտ եմ պարզել,
Քո շնչից հաշմված սիրտ,
Հակված եմ դեմդ - անզեն –
Վայելիր ուշիմ ու կիրթ։

Սպասք է ու սկուտեղ
Իմ ափը – կեր, ի՛մ անտուն,
Կեր սիրտս - միայն սերտեմ
Անունդ – օ~, Անանուն: