ՆՈՒՅՆ ԲԱԽՏՈՎ - Տարիներ շարունակ տնից տուն տեղափոխվելով՝ Անահիտի ընտանիքը վերջապես իր սեփական հասցեն ունեցավ: Իր 3 երեխաների ու մոր՝ տիկին Օլգայի հետ, Անահիտը հաստատվեց Աշտարակ քաղաքի Արայի թաղամասում: Արդեն 7 տարի՝ 5 հոգանոց ընտանիքն իր գոյությունը պահպանում է այս կիսախարխուլ տնակում՝ մկների ու միջատների ընկերակցությամբ: Ամուսնուց բաժանվելուց հետո Անահիտն իր երեխաների համար ստիպված եղավ նաև հայր դառնալ, այնպես, ինչպես ժամանակին իր մայրն էր ստիված դա անել: Տիկին Օլգայի խոսքով՝ իր աղջիկն այսօր անցնում է այն նույն դժվարությունների միջով, որոնց միջով անցել է հենց ինքը: