ԶԱՀՐԱՏ

**Harutin** » 31 окт 2010, 00:19

Ահմետ Էֆենտի փողոցը

Կիկո կը վախնա Ահմետ Էֆենտի փողոցեն անցնելու
Ահմետ Էֆենտի փողոցը մութ է
Մութին համբուրվող զույգեր կան

Կիկո կը վախնա Ահմետ Էֆենտի փողոցեն անցնելու
Իր առանձնությունը միտքը կ'իյնայ

**Harutin** » 31 окт 2010, 00:20

Այցելություն

Դուռը բացի որ Կիկոն էր - հրամմե ըսի - նստեցանք
Կիկո ըսավ թե շատ կարոտցեր էր զիս
Ես ըսի թե շատ կարոտցեր էի զինք
Հետո խորհեցա թե զինք որքան շուտ մոռցեր էի
Հետո խորհեցա թե զիս որքան շուտ մոռցեր էր ինք

Ըսի որ ավելի հաճախ կ'ուզեմ տեսնել զինք
Ըսավ որ ավելի հաճախ կ'ուզե տեսնել զիս
Որոշեցինք ավելի հաճախ տեսնել զիրար
Գնաց - դռան մեկ կողմն ես - դռան մյուս կողմն ինք
Արդեն իսկ իրար մոռցեր էինք

**Harutin** » 31 окт 2010, 00:20

Ոխ

Միտքը դրեր է Կիկո
Պիտի չմեռնի

Դուք բոլորդ պիտի մեռնիք
Աշխարհ Կիկոյի պիտի մնա

Ու Կիկո աշխարհի վրա միս-մինակ
Բոլոր հայելիները պիտի կոտորե

**Harutin** » 31 окт 2010, 00:20

Տարբերություն

Կիկո աչքերուն ակնոց է առեր
Ուր որ կը նայի կապույտ կը տեսնե
Երկինքը կապույտ - ծովերը կապույտ
Սիրած աղջկան աչքերը կապույտ
Ուր որ կը նայի կապույտ կը տեսնե

Ակնոցը քթին չորս դին կը նայի -
Կ'ըսես ծովերը կապույտ էին միշտ
Կ'ըսես երկինք կապույտ էր արդեն
Չի հավատար որ - նոր տեսա կ'ըսե
- Ակնոցը քթին չորս դին կը նայի

Կիկո աչքերուն ակնոց է առեր
ՀԻՄԱ կապույտը կապույտ կը տեսնե

**Harutin** » 31 окт 2010, 00:21

Կիկո մեռավ

Բացօթյա շատ պառկեցավ
Թող քիչ մըն ալ հողին տակ քնանա

Հանգիստ իր կոշիկներուն

**Harutin** » 31 окт 2010, 00:21

Կաղանդի ծառ մը

Կաղանդի ծառ մը շտկելու համար
Երկու բան պետք է
Նախ ծառ մը - հետո զարդեր ծառին վրա

Կաղանդի ծառ մը շտկելու համար
Երեք բան պետք է
- Ծառեն զարդեն զատ
Հավատքը գալիք աղվոր օրերու

Կաղանդի ծառ մը շտկելու համար
Մեկ բան կը բավե - ոչ ծառ ոչ ալ զարդ -
Ատիկա խիճերն ադամանդ կարծող
Միամիտ հոգվույս բարի խաբկանքն է

Կաղանդի ծառ մը շտկելու համար
Արդեն պատրանքը լրիվ կը բավե

Բարի տարի ձեզ և բարի պատրանք

**Harutin** » 31 окт 2010, 00:21

Մարդու մը միտքը

Ծառին կը նայի - ծառը չի տեսներ - ինքզինքը կը տեսնե
Ճամփուն կը նայի - ճամփա չի տեսներ - ինքզինքը կը տեսնե

Վեր կը նայի - ասուպներ կան երկինքն ի վար -
Չի տեսներ - ինքզինքը կը տեսնե

Ու հայելին կը նայի - չի տեսներ ինքզինքը -
- Կը բարևե

**Harutin** » 31 окт 2010, 00:21

Ճայը

Եթէ ճայը լուռ է
ալիքներուն դէմ
ըսել չէ թէ ըսելիքներ չունի
իր կամ աշխարհի մասին-
Եթէ լուռ է
ըսել է թէ կը նախընտրէ լռել

Ըստ ճային-ծովը
փոխանակ լայն երկայն այդպէս պառկելու
Եթէ ոտքի ելլէր
կենար
պիտի ճայ մը ըլլար սլացիկ
սիրատենչ
և էգ

**Harutin** » 31 окт 2010, 00:23

Անուշապուր

Կաղանդ Պապա մը գար
Նուէրներ բերէր
Տար տար չհատնէր

Ծառ մը բարձրանար
Թիզ թիզ-օրէ օր-
Երկինք չհասնէր

Ինչ որ կեանք կ´ըսենք
Անուշապուր մը ըլլար-ուտէինք-
Կեր կեր- չհատնէր

**Harutin** » 31 окт 2010, 00:23

Ժյուլ Վերն

Հակոբ նավապետ զավակներ ունի
Իրենց հորը պես նավապետ ըլլալ կ'երազեն
Մին զրահավորի - մյուսը ընդծովյայի
Մյուսը թրանսադլանդիկի

Հակոբ նավապետ աղջիկ մըն ալ ունի
Եղբայրներուն վրա կը նայի - հուսահատ
Ժյուլ Վեռն կկարդա