***
Մաքուր է
Պոռնիկը (երբ մայր է),
Ցեխոտ երեխան` կիսամերկ,
Հիսուսը` խաչին,
Առավոտյան մարդկությունը արթնացող
և մեր անզուսպ լացը:

***
Հիմնականում
Կարոտում ենք ինքներս մեզ,
Նեղվում–զայրանում ենք չնչին բանից,
Երջանիկ ենք, երբ կոշիկը լավ է նստում,
Կարիք ունենք հասկացվելու և
ՄԵԿԸ գա ու մեզ շոյի …

***
Միստիկական
Լուսաբացը ծավալվում է լեռներում …
Խոհանոցում թեյ եմ խմում աստղահամ …
Գիշերները նորոգում են մեր հոգին …
Ցող է իջնում քաղցրատեսք …
Մի շնորհով գիտեմ իմ ավարտը …

***
Մենք
Մեր ճակատագրից լայն ենք,
Ավելին ենք, քան թվում է, թե կանք,
Եղբայրներ ենք (թող որ հիմար թվամ),
Նույնն ենք …
Մարդ ենք և … ՈՉ ՄԻԱՅՆ:

***
Հայրենիքը
Սրտի մեջ է, ոչ քարտեզի,
Չի ճանաչում արդարացում,
Միշտ ներում է
Իր անառակ որդիներին,
Աստծու պես մի բան է: