***
Աշնանային այգիներում
Լռել են ձայները խնջույքի,
Դատարկ են շշերը գինու…

Ճերմակ թուղթն
Ինձ ուղեկցում է դեպի Գողգոթա…

***
Դույլն ավերում է
Դիմապատկերը`
Ջրհորի մեջ կախված…

Ծարավ կովերը
Տուն են վերադառնում դաշտերից…

***
Նռան գինի գնեցի,
Ծիրանի օղին դրեցի սառնարանում,
Ձուկը համեմեցի աղով ու պղպեղով…

Ծխում եմ` կանգնած պատշգամբում,
Լուսնի հայացքը երկնքում սառել է…

***
Աշնան քամին
Լուսնի սև մահիկով
Շրջում է այգում…

Հեռավոր իմ ընկերներ,
Վերջին ընթրիքի գինին պահել եմ…

***
Ձմռան սառնամանիքին,
Մահը երեքնուկի հետ
Գլուխը թաքցրել է քարերի մեջ…

Նրանք միասին էին
Օրհասական բոլոր պահերին:

***
Երկար բացակայությունից հետո
Տուն վերադարձա,
Ընկերներս բոլորը հողոտ էին.

Նրանք ուռենու չորացած ճյուղերով
Ինձ սպասում էին գերեզմանատանը…