Դիպված

Մի սեւ կատու, կեցվածքով անբռնազբոս,
Կարմիր լույսի տակ փողոց էր անցնում:
Սնահավատ ու կարգապահ վարորդներին,
Անկարգապահ երթուղային տաքսիներին,
Եւ բերանբաց անցորդներին,
Եւ խիստ ու զգոն ոստիկանին
Նա զայրացնում էր եւ մի փոքր ապշեցնում:

Իսկ վարորդները` շփոթված ու մտահոգ,
Միմյանց զիջելու անկեղծ մղումով,
Հայհոյելով այդ կարգազանց չորքոտանուն,
Թարսությունից այս նոր` մի փոքր վախեցած,
Շոգից գժված ու կատաղած,
Բայց, արտաքուստ` հանգիստ նստած,
Արգելակել էին եւ չէին էլ շտապում:

Իսկ սեւ կատուն` այդ հարգանքից անչափ զգացված,
Դանդաղ ու հպարտ` փողոց էր անցնում,
Ձգձգելով այդ րոպեներն աստեղային`
Մտքում դիմում գալիք պայծառ ապագային,
Նա երազանք էր փայփայում,
Թե` կատվաշատ իրենց բակում
Նա միաձայն պատգամավոր է ընտրվում:

Մի սեւ կատու, կեցվածքով անբռնազբոս,
Կարմիր լույսի տակ փողոց էր անցնում:
Սնահավատ ու կարգապահ վարորդներին,
Անկարգապահ երթուղային տաքսիներին,
Եւ բերանբաց անցորդներին,
Եւ խիստ ու զգոն ոստիկանին
Նա զայրացնում էր եւ մի փոքր ապշեցնում:

Մի սեւ կատու, կեցվածքով անբռնազբոս,
Փողոցը անցավ կարմիր լույսի տակ:

քո սև կատուն կարմիրը հենց իմացելա կանաչա, համ էլ սև կատվի համար լույսը`լույսա