***
Քարը քարի գլխին նստել
Քարը քարին ճզմել,
Այդ իմ վիշտն է ոտքի ելել
Քարափները գրկել:
Իրար գրկել, չեն խռովել,
Իրար շատ են սիրել,
Տնավարի այսպես նստել,
Տնավարի լռել:
Ու լռել են, բայց չեն տխրել
Իմ վշտերը երբեք,
Քար ու քարափ, դուք փնտրեցեք
Ձեր արձագանքն իմ մեջ:

***
Տուր ինձ աչքերիդ
Լույսը այս գիշեր,
Ես պիտի իջնեմ
Փողոցն ամայի,
Ու նստեմ մայթի
Սառը քարերին,
Համր խավարին
Քո մասին պատմեմ:
Այս գիշեր աղքատ
ուրվականի պես
պիտի լույս մուրամ,
ու փողոցի մեջ
սերս խնկարկեմ:
Տուր ինձ աչքերիդ լույսը
այս գիշեր` երգս ավարտեմ…