***
Երբ նայում եմ քո նկարին
Քո հրաշքը տեսնում,
Սիրտս հույզից փուլ է գալիս,
Հոգիս՝ ալեկոծվում...

Ուզում եմ քեզ գրկել ամուր, Կարոտաբաղձ ու ջերմ,
Քեզ փոխանցել կարոտս հուր,
Ու խենթի պես սիրել...

Ս.Մալխասյան

ԸՆԴՎԶՈՒՄ
Ընդվզեցիր անեղծ կարոտիս դեմ,
Կուլ գնացի քո մերկ ընդվզումին...
Վաղուց Հուշ են դարձել երկու անդեմ,
Երկու օտարացած սիրտ անտունի՝
Կարոտ պատահական հանդիպումի...

Ս.Մալխասյան 31.10.2017

ԱՊՐԵԼ
Ապրել մարդավայել ու արժանապատիվ,
Արծվի ճախրանքի պես՝ մեղմ ու հանդարտ,
Բարին ու ազնիվը անազնիվից զատել,
Արդարամիտ լինել ու ինքնադատ:

Ապրել` հայացքի մեջ գորովանք ու ժպիտ,
Լեզվին՝ բառեբանում ու հույսերին՝ ճախրանք,
Լռության մեջ՝ խոհեր, խոսքերի մեջ՝ կուռ միտք
Սխրանքներում՝ բորբոք, հուզման պահին՝ մարմանդ:

Ապրել Աստվածակերպ` ապրեցնելով մարդկանց,
Ոգի ու շունչ ցանել ամուլ հոգիներում,
Օգնության ձեռք մեկնել առանց խնդրանք ու հայց`
Հոգում՝ միայն բարին ու սրտի մեջ` ներում:

Ս.ՄԱԼԽԱՍՅԱՆ։ 1.03.2012

Մ.Յու.Լերմոնտով

ՁԱՆՁՐԱԼԻ Է, ՏԽՈՒՐ...
Ձանձրալի է, տխուր և ձեռք մեկնող չկա,
Տառապանքի ժամին հոգուդ ցավի:
Անօգուտ է անվերջ երազել ու տոկալ,
Կորան տարիները լավ ու բարի...
Սիրե՞լ, բայց ու՞մ, ասեք...
Կարճ սերն անիմաստ է,
Բայց և անհնար է հավերժ սիրել:
Անցյալի հետք չկա մեր հոգում, դա փաստ է,
Տառապանքն էլ, խինդն էլ մեզ չեն տիրել:
Կրքերը ի՞նչ արժեն.
Չէ՞ որ, օրից մի օր,
Կորչելու են հոսքում մտորումի...
Եվ, որ կողմ էլ նայես`
Քո մեջ, թե շուրջբոլոր,
Հիմար ու փուչ խաղ է կյանքն ամենի...

Թարգմանեց՝ Ս.Մալխասյանը

Մ.Յու. Լերմոնտով

***
Ցոլում է ճերմակ առագաստը
Ծովի երկնագույն մշուշի մեջ,
Եվ ո՞րն է նրա որոնածը,
Ինչ՞ու է լքում եզերքն իր պերճ:

Քամին ցնցում է ալիքն ընդոստ,
Ճկվում է կայմը ու ճռնչում...
Ավաղ, նա բախտ չի լքել անհույս,
Եվ ոչ էլ հուսո ափ է փնտրում:

Նրա դեմ լույսն է լազուր ծովի,
Վերում` արևի ճաճանչն է լուրթ,
Նա փոթորիկ է խնդրում մոլի,
Կարծես հողմում կա հանգիստ ու գութ...

Թարգմանեց` Սեյրան Մալխասյանը

М.Ю.Лермонтов

***
Парус
Белеет парус одинокой
В тумане моря голубом!..
Что ищет он в стране далекой?
Что кинул он в краю родном?..

Играют волны — ветер свищет,
И мачта гнется и скрипит...
Увы! он счастья не ищет,
И не от счастья бежит!

Под ним струя светлей лазури,
Над ним луч солнца золотой...
А он, мятежный, просит бури,
Как будто в бурях есть покой!

Ա. Ս. Պուշկին

ԾԱՂԻԿԸ
Ահա մի ծաղիկ, թոշնած ու հին,
Անբույր մի ծաղիկ, գրքում դրված:
Եվ նորեն մտքիս նավակն անթի
Երազիս թևով մղվեց առաջ...

Ե՞րբ, որտե՞ղ ծաղկեց, ո՞ր գարնանը,
Երկա՞ր է ապրել, ո՞վ գլխատեց,
Ծանո՞թն էր արդյոք, թե՞ օտարը,
Ո՞վ այս գրքի մեջ նրան փակեց...

Ջերմ հանդիպումի՞ հուշ է արդյոք,
Թե՞ բաժանումի` հավատազուրկ,
Տառապա՞նք է սիրո մի անամոք,
Թե՞ պուրակում գտած աշնան մասունք...

Ապրու՞մ են մինչ հիմա, նա՛, ապրու՞մ է,
Կորցրե՞լ են իրար, դարձա՞ն մի տուն,
Թե՞ հանդիպման հուշը դեռ անտուն է,
Ինչպես ծաղկաթերթն այս անհրապույր...

Թարգմանեց Ս.Մալխասյանը

Վալենտին Ուստինով
ՀՈԳՈՑ
Դու անկեղծ ես շատ: Անհարմար է դա:
Դե առանց գաղտնիք հույսը հոգս է լոկ,
Ցավալին այն չէ, որ սեր չտեսա,
Այլ, որ չորսացի պահը անցողիկ:

Փշոտ խոսքերդ կուլ տվի անցավ,
Ասե՞լ, որ անվերջ տարակարծ էինք,
Ցավալին այն չէ, որ քեզ չիմացա,
Քեզ ճանաչելը մեծ ցավ կլիներ:

Բայց միայնության ձայնը հնամյա,
Բախտիս պես հոգոց հանեց թախծալի,
Ցավալին այն չէ, որ տխուր եմ հար,
Այլ, որ կմնամ առանց հին ցավի…

Թարգմանեց` Սեյրան Մալխասյանը

🎬🎼🎤🎻«Կարոտ»
Սեյրան Մալխասյան,
Կարդում է Ջիվան Սարգսյանը
,

Ա Փ Ս Ո Ս…

Եկան տաղտկալից օրերը կրկին,
Ավարտվեց հեքիաթն իմ իսկ հորինած,
Հավատում էի հոգուդ դրախտին,
Մինչդեռ այն էլ էր խախուտ ու…փլվեց:

Իսկ ինձ թվում էր կանայք տարբեր են…
Որ նուրբ է հոգիդ, բարի է, ներող,
Որ երբեք, երբեք չի դատափետի
Սիրուս բռնկման առկայծն անողոք:

Ի՜նչ միամիտն եմ, և որքա՜ն նվաստ,
Ո՞նց հավատացի հոգուդ դրախտին,
Համոզված էի, գեթ դու ես, որ կաս,
Եվ քո մեջ տեսա իմ հրեշտակին:

Ինչևէ, եղավ, ինչ պիտի լիներ,
Ու բացվեր պիտի քողն իմ աչքերի,
Ափսոս, իմ գտած սափորը սին էր…
Մի սովորական կին էր իմ փերին:

Ս.Մալխասյան 30.01.2013

ՔՈ ԱՐԵՎԸ

Ինչպես տերևն է կաթում ծառերից,
Ինչպես փաթիլն է ամպերից թափվում,
Այնպես էլ սերդ` պոկվել իմ սրտից,
Չի վերադառնում:

Ամպը ամպին է փութով միանում,
Լուսինը երկրի փարոսն է հավերժ,
Աստղերը իրար աչքով են անում,
Դու... հեռու ես միշտ:

Սպասեմ: Գուցե արևը ծագի
Ու ծաղիկները պարուրվեն իրար,
Եվ քո արևը ճաճանչն իր թափի
Իմ սրտի վրա...

Ս.Մալխասյան