ԱՆԿԱՊ

Լուցկու տուփ չկա,
Մտքերս անկապ
Շարեմ գլխիվայր:
Ելքը չերևաց
Լաբրինթոսների ետևում
Նրանց:
Քաոսածինը
Աժաջնեկը չէ
Համաչափության,
Հիսունիններորդ
Նշանն եմ փնտրում
Իմ թվանանության:
Բրոունյան շարժում
Ուղեղիս սխալ
Միկրոսխեմայում,
Անհագ մտքերս
Իրար են ուտում
Փակ գանգուղեղում...
Բառերի բացատ,
Մտքերի անտառ,
Խոհի զառիվայր,
Ոչ տուփ կա լուցկու,
Ոչ էլ հատիկը՝
...Վառելու համար...

Ռ.Խաստյան

***
Տխուր է: Միտքը իմ լուռ է:
Միջիս աղմուկը,-
Աննպատակ:
Անդորր է: Քամուց՝ հզոր է:
Հանգում է կայծն իմ՝
Անժամանակ...
Երեկ էր: Այսօր է:
Ամենօր է:-
Նույնն է լինելու նաև էգուց...
Սովոր եմ: Տխուր եմ: Մոլոր եմ
«Եղանակը
Փոխվում է Հոգուց...»
Ռ.Խաստյան

ԴԱՐ

Թող որ խղճուկ է
Անարժան դեմքը
Իրական դարի,-
Ճորտացնում է նա
Արծաթի փայլով
Մարդուն՝ սնարից:

Բայց թոհուբոհում
"Առ ու տուր"-երի
Այլ արժեքներ կան,-
Հանճարեղ է նա,
Ով որ դարի մեջ
Մնում է միշտ մ ա ր դ:

Ռ.Խաստյան

ԴՈՒ Ի՞ՆՉ ԳԻՏԵՍ, ԱԽՊԵ'Ր...
Դու ի՞նչ գիտես, ախպեր,
Քանի գնդակ եմ ես
Օդում կրակել,
Որ
Փոքր
Ի շատե-
Օտարությունն այս
Յուրայինի տեղ
Նվաստըս ընդունե...
Դու ի՞նչ գիտես, ախպե'ր,
Քանի՞ անգամ եմ ես
Օտարի առաջ՝
Լեզուս կծելով,
Լռին ծնրադրել...
Դու ի'նչ գիտես, ախպե'ր,
Որքան, որքա՜ն եմ ես
Որպեսզի ապրեմ՝
Ինքս ինձ սպանել...
Դու ի՞նչ գիտես, ախպե'ր:
Գիտենալու համար
Հարկ է հո'ս լինել:
Ու չգիտեմ, նույնիսկ,
Օրհնե՞մ թե անիծեմ
ՔԵԶ՝
Բա'խտ հայի... թե՝ խելք:
Ռ.Խաստյան

ԵՍ ԱՅՆՏԵՂ ՉԷԻ…

Ես այնտեղ չէի լոկ ֆիզիկապես,-
Չէին խլանում իմ ականջները դղրդոցներից,
Չէին կուրանում աչքերս փոշոտ՝ կրակ-լույսերից,
Եվ իմ սիրտը չէր վրեժի բոցով վառվել-մոխրացել,
Կամքն էլ իմը չէր, որ դուրս էր ժայթքել դարավոր քնից:
Հրաձիգը պինդ ձեռքում սեղմողն էլ՝ ես չէի այնժամ,
Ես չէի նաև մտքին դնողը. "վերջին փամփուշտը՝ թշնամու համար..."
Աչքերն արյունոտ, Հոգին՝ պարզամիտ,
Վերջին գրոհով,
Հաղթանակ տանող հայորդին չէի,
Իր միակ ուխտը. « հայրենի իմ հող», -
Աղոթքի նման լուռ շշնջացող,
Հանուն իր նախնյաց փառքի ու պատվի,
«Ի զե՜ն» գոռացող ու առաջ նետվող,
Թշնամուն քշողն էլ՝ չէ', ես չէի,
Հանուն իր խղճի,
Հանուն սուրբ հողի,
Հանուն իր որդոց
Շուշին ազատող մարտիկը չէի...
Բայց մեջն էի ես մի կաթիլ արյան նրա երակում,
Որը թափվում էր սրբազան հողում առանց վախ ու դող...

Փա՜ռք քեզ իմ մարտիկ, ազատամարտիկ,
Ես քեզ հետ չէի ֆիզիկապես, լոկ:
Իմ ողջ էությամբ քեզ հետ էի ես
Իմ հայոց հերոս...

Ռ.Խաստյան