Գրիշ Դավթյան

**Harutin** » 25 июн 2011, 17:43

Աշնանային պարտեզում

Դու եկել ու ղողանջում ես
Տերեվաթափ իմ աշնային
Պարտեզում.
Սիրտս է զնգում ու զրընգում
Իմ հուշերի այն թավշային
Երազում...
...Որ վազում եմ,
Որ քեզ բռնեմ
Հին թթենու շվաքում,
Ու աչքերիդ ցոլքի վրա
Թափեմ պեծերս ալքրքում...

Երեկո է մեղմ, վարդագույն,
Մթնշաղում դեռ ցոլում են
Լույսի բեկվող երիզներ,
Բայց պատկերը՝
Որ խուսափում
Ու փախչում ես հեվիհեվ,
Որ ուզում ես դեռ բռնեմ քեզ
Մի ոսկեգեղմ թիթեռի պես,
Դեռ թեվում է իմ աչքերի
Երազում...

Բույր ու համի ջերմ ու քաղցրով
Իմ շուրթերն են սեղմվում,
Տրոփում է սիրտս... սի՜րտս...
Որ եկել ու ղողանջում ես
Տերեվաթա՜փ իմ աշնային
Պարտեզում...

Գլենդել, Կալիֆորնիա,
2006-05-14

**Harutin** » 26 июн 2011, 23:21

ԵՐԱԶԱԹԱՓ

Լույս ու մութ,
Լույս ու մութ,
Մթնշաղ է.
Երևում,
Չի երևում գիշերը։

Հազիվ անցնում է ճամփան,
Թեքվում է ոլորանը,
Հասնում է երազին.
Այնքան լավն է,
Այնքան քաղցր.
Իրականանում են ցանկությունները։

Մութ ու լույս,
Մութ ու լույս,
Աղջամուղջ է.
Երևում,
Չի երևում առավոտը։

Վերջապես ավելանում է լույսը,
Աղջամուղջը հալվում է
Լույսի մեջ.
Երազը անհետանում է։

Կանգ է առնում,
Վերադառնում է,
Անցնում է ոլորանը,
Փնտրում է երազին։

Լուսացել է,
Երազ չի մնացել...

Գլենդել, Կալիֆորնիա,
2007-01-19

**Harutin** » 29 июн 2011, 16:07

ՄՈՌԱՑՈՒԹՅՈՒՆ

Չեմ հիշում,
Շատ բաներ չեմ հիշում...
Միայն հիշում եմ,
Որ շատ բաներ եմ մոռացել:

Հսկայական մոռացությունների հիշողություն:

Մի փշրանք հիշողություն,
Որ տարածվում է մտքումս
Որպես տաքության ու շոգի ծածանումը
Հեռու ենթադաշտում:

Թիթեռների ինչ-որ թրվռոց էր,
Շողերի ինչ-որ գունավորում,
Որ մարում են
Հիշողությանս հետ:

Բանե՜ր, որ քաղցր էին
Եվ հիմա չեմ հիշում,
Բայց դեռ զգում եմ նրանց համը...

Ես սիրաբանում էի քո երիտության հետ,
Քո գեղեցկության հետ,
Քաղցր, փափուկ ու տաքուկ...

Ես դա հիշում եմ
Այսօրվա իմ մրսկոտությամբ...
Քաղցր էր,փափուկ ու տաքուկ...
Եվ չեմ հիշում մյուս մոռացածներս:

Հեռավորության մի ծավալ է,
Անըմբռնելի մի բովանդակություն,
Ուզում եմ հասնել...
Բայց չեմ հիշում.
Խարխափումս չի հասնում թռիչքի:

Հասունության տարիներիս կուտակումով,
Որ հավատարմության ու վստահելիության
Շքեղությամբ են փայլեցրել ինձ
Հասել եմ,ահա,
Վաստակավոր մոռացության,
Միամտության,
Մտավոր հանգստի:

Չեմ հիշում մոռացկոտությունս...
Չեմ հիշում...

Գլենդել, Կալիֆորնիա
2010-01-07

**Harutin** » 29 июн 2011, 16:09

ԿՐԱԿԱՊԱՇՏ

Ես գիտեի,
Որ մի օր տեսնելու եմ քեզ
Ամբոխի մեջ,
Որի մասը չես կազմում.
Այլ եղել ես իմ տեսիլքը,
Որ դեռ մանկուց
Ցոլացել է իմ երևակայության մեջ։

Մանկության ու պատանության ոսկետեսիլ,
Որ վառվել է
Բոցերի ամենամաքուր գույներով,
Անմոխիր մնացորդով
Անկեզ մորենու նման...

Հրավառումներ կան,
Որ սպառվում են առանց անթեղի...

Դու տեսիլքի նման ես այրվել
Երևակայությանս մեջ
Ջինջ ու զուլալ այրումով։

Երգեր են ղողանջել իմ շուրթերին
Սերերի ու նվիրումների համերգներով.
Աստղավառումներ են եղել իմ եթերում
Ասուպների ու արևաքարերի շաղով,
Որ թափվել են,
Թափվել են
Բոցերից ցատկող պեծերի նման,
Որ եղել են
Երևակայությանս լավ երազները...

Երազներ` պեծերի ու կայծերի,
Որ չեն խամրում բոցալեզուների ծայրին...
Այլ կամարվում են,
Որպես երփներանգ ծիածան,
Տենչալի տևողություն ու տարածք
Երկրային վայելքների...

Հրավառվիր ցանկություններիս խարույկում,
Որ կրակապաշտի հավատքով
Պաշտեմ հուրդ, կրակդ ու բոցդ...

Գլենդել, Կալիֆորնիա, 2007-09-02

**Harutin** » 29 июн 2011, 16:19

Սիրով զինավառ

Ահա եկել եմ մասնակցելու
Այս կռվին,
Զի զինավառ եմ իմ սիրով,
Այլ ոչ սրով,
Որ ավարտին
Ժանգում է արյան ճապաղով:
Իսկ սերը
Միշտ էլ ջերմանում է համբույրներով
Ու ավարտին
Քաղցրահամն է պահում շուրթերին:
Թող փայլատակի իմ սերը
Այս կռվի ասպարեզում,
Որ կյանքս է,
Որ չիմանալով սկսեցի
Եվ շարունակում եմ բնազդով,
Ավելի ամուր ու դիմացկուն
Քան մտադրությունը,
Որ մոռացվում է.
Քան կամքը,
Որ թուլանում է:
Սիրվտում եմ կյանքի հետ,
Հասնում եմ գինովության.
Ճաշակում եմ հեշտանքը
Արբեցումի ու վայելքի...
Զինավառ եմ իմ սիրով:
Այս դալարությունը,
Որ ուռճանում է գրկումս.
Վայելում եմ:
Այս սիրունն ու քնքուշը,
Որ կին քաղցրությամբ մոլորեցնում է:
Մոլորվում եմ:
Զավա՜կ... շարունակությունս,
Որ սնում եմ.
Որ զինավառ է սիրով,
Ու շարունակում է բնազդով:
Այս մտահոգությունները,
Որ... չէ,
Դեռ չեմ խեղդվում...
Վանում եմ:
Բոլոր չհիշողություններս
Մոռացության արդյունք չեն,
Մտահանությամբ եմ նվազեցնում
Սրտմտություններս...
Ծաղկումի,
Հասունության,
Թառամության,
Զառամության
Մի հոյակապ սլացք,
Որ վատնում եմ զինավառ սիրով:

Գլենդել, Կալիֆորնիա
2009-12-05

**Harutin** » 29 июн 2011, 16:19

Վարակված

Դու այնքան անփույթ ես,
Որ չես հիշում գեղեցկությունդ,
Եվ այդպիսով իսկ
Մնում ես ինքնավստահ
Ու ցանկալի...
Քո շուրթերին
Թովչության մի ժպիտ կա,
Որ անկարելի է համբույրով իսկ
Խանգարել...
Չի լինում,
Չի լինում հիշեցնել քեզ,
Կամ խանգարել ժպիտդ:
Քո աչքերում
Երազանքի մի գաղտնիք կա,
Որ երբ մոռացությամբ կկոցում ես,
Հասնում է հորիզոնին:
Գարնանային անծանոթ մի ծաղկի
Բուրմունք է թափվել վրադ,
Չեմ կարողանում ազատվել
Բույրիդ հրապույրից:
Ցանկությանս տատրակները
Թառել են լանջիդ տաքուկում...
Վախենում եմ նայվածքով իսկ դիպչել,
Որ խուճապի չմատնվեն,
Որ մեղավոր չզգամ:
Անհուսալիորեն վարակված եմ
Գեղեցկությամբդ,
Ժպիտովդ,
Գաղտնիքովդ,
Բույրովդ
Ու ցանկությամբս...
Ցանկությամբս...

Գլենդել, Կալիֆորնիա
2009-12-07

**Harutin** » 29 июн 2011, 16:19

Առուն

Վառ երևակայությամբ
Ու մանկության հուշերով
Առուն հոսում է իմ մտքում,
Որ հոսում էր մեր փողոցով...
Ամառային ջերմ օրը բացվում էր
Գալիքների օրհնությամբ,
Որին անգիտակից միամտությամբ
Թերթում էինք օրն ու գիշերը,
Մեր օրավուրը:
Մենք աճում էինք
Եվ քաղաքը զարգանում էր:
Զարգացումի հետ եկան
Քաղաքապետարանի բանվորները
Լայնացնելու փողոցը:
Քանդեցին,
Լցրեցին,
Հավասարեցրին առուն քարուհողով
Ու ասֆալտապատեցին:
Առուն
Որի ափերին խաղացի մանկությունս
Հիմա հոսում է իմ մտքում
Նույն մեղմօրոր խոխոջով,
Որ պատմում է հեքիաթներ.
Նույն զվարթ փսփսոցով,
Որ գաղտնիքներ է բացում.
Նույն քչփչոցով
Որ բամբասում էին աղջիկները...
Փողոցի տաք հողերի մեջ
Խաղում էի,
Լվանում էի հողոտ ձեռքերս
Զուլալ առվաջրում.
Ոտքերս պաղ առվաջրում
Զովանում էի
Ամռան շոգում:
Զովությունը պսպղում էր
Շոգ ար¨ի տակ,
Առուն հոսում էր:
Ու չէի նկատում,
Որ մանկությունս Է հոսում
Առվի ջրերի հետ
Զով ու զուալ...
Զով ու զուլալ...

Գլենդել Կալիֆորնիա,
2009-12-11

**Harutin** » 29 июн 2011, 16:20

Աստվածային շնորհով

Հիմա, որ
Աստվածային արարչությամբ
Ծնվել եմ,
Եվ կյանքը պարունակում է
Այս բոլոր բարիքները.
Ջանքերը,
Վայելքները,
Աշխատանքն արդար.
Թող լինի հաճույքով
Ու առանց ցավի,
Ինչպես արարեց Աստված,
Ստեղծագործական բավարարությամբ,
Ախորժությամբ, արդյունավետությամբ,
Որ լինի լավ ու ցանկալի,
Քաղցր, փափուկ ու համով,
Ինչպես խնձորը այտերիդ,
Որ կծում եմ.
Ինչպես գուլինարը շուրթերիդ,
Որ խփշտում եմ.
Ինչպես մախմուրը կոնքերիդ,
Որ շոյում եմ,
Որ ճմոխում եմ.
Ինչպես ծիրանահամը ծոցիդ,
Որ արբեցնում է...
Հավիտյանս ամեն:

Գլենդել Կալիֆորնիա,
2009-12-12

**Harutin** » 30 июн 2011, 19:53

Ամբողջացում Ա

Հեռուն տատանվում է հորիզոնի գծի վրա
Գիծ է, գիծ չէ, հեռուն է, հեռուն,
Որ տատանվում է ,
Ծածանվում է
Մտքիս ու ցանկությանս առագաստով:
Մոտեցիր, որ չմնաս հորիզոնում,
Որ լինես սրտիս
Ու աչքերիս մեջ.
Որպեսզի համորեն սիրեմ քեզ,
Համորեն ճաշակեմ քեզ,
Որպես կյանքիս քաղցրությունը:
Սիրուդ աստղունքը առկայծում են
Զգացումներիս երկնքում,
Ջերմությունդ ողողել է գրկիս կարոտությունը,
Աչքերիս լճակներում գեղեցկությունն է քո գոյության,
Եվ քաղցրությունդ ճաշակում եմ շուրթերիս:
Խորացիր սրտիս մեջ,
Որ հասնես սիրուս հավաստիությանը,
Խորացիր,
Որպեսզի հասունանա վայելքի համը,
Համովությունը դառնա բավարարության բալասան,
Եվ ուռճացող ալիքը փշրելով
Ընդարմացնի լարումը որոնումներիս,
Ընդարմացնի լարումը որոնումներիդ:
Անդորրի օրհնության մեջ է,
Որ հասնում եմ քեզ,
Որ հասնում ես ինձ,
Որ ամբողջանում ենք տիեզերքով:

Գլենդել, Կալիֆորնիա,
2007.01.21

**Harutin** » 30 июн 2011, 19:53

Ամբողջացում Բ

Հորիզոնի գծի վրա տատանվում է լուրթ հեռուն,
Գիծ է, գիծ չէ, երկրի, երկնի համբույր է ջերմ ու եռուն,
Որ տատանվում, ծածանվում է ժամանակի ալիքով,
Խոր ցանկության ու մտքերի առագաստով, գալիքով:
Մոտեցիր ինձ, որ չմնաս հորիզոնի կապույտում,
Այլ լինես իմ սրտում, մտքում ու աչքերիս վճիտում.
Որպեսզի քեզ սիրով ցանկամ, որ ճաշակեմ քո սերը,
Որպես կյանքի և ըղձության քաղցրագունած հույսերը:
Սիրուդ աստղունքն առկայծում եմ զգացմունքիս երկնքում,
Ջերմությունդ ողողել է, կարոտությունս է գրկում.
Իսկ հայացքիս լճակներում գեղեցկությունդ է լուսեղ,
Որ անուշով մեղրանում է, համբույրներով սիրագեղ:
Խոր խորացիր իմ սրտի մեջ, հասիր սիրուս հավատին,
Որ վայելքի համն ու բույրը հասունանա վերստին,
Հասնի թանձրին մեր հագուրդի, հանց գոհության բալասան,
Ընդարմացնի լարումները մեր փնտրածի սրբազան:
Անդորրության օրհնությամբ է, որ ես առ քեզ եմ հասնում,
Անդորրության օրհնությամբ է, որ դու առ ինձ ես հասնում,
Մեր հոգեկան ու մարմնական տարերքի հին խառնուրդով,
Ամբողջանում ենք մարդկորեն, տիեզերյան համույթով:

Գլենդել, Կալիֆորնիա
2007.01.23