***

Մեծ թռիչքից հետո վայրէջքի եմ գնում՝

Իմաստնության, մահի…

ՄԱՐԳԱՐԵԻ ՈՂԲԸ

Արտասվե՛ք ինձ համար, ես այսօր Աստըծուն հանդիպեցի...

ԻՄԱՑԱ

Աստծուն հանդիպելով, ինքդ քո մեղքերին կհանդիպես...

***

Ինչը տանդ մեջ է, ա՛յն է Աստված,

Ինչը դրսում` ամայություն է...

ՏԱՆԸ ՉԻ

Հայրը դրսից է գալիս կամ թե` դրսում է,

Որ տունը պահպանվի...

***

Երբ հայրդ չկա, ծառը հայրդ է...

ԲԵՌԱՆ ՆԵՐՔՈ

Ես քաշում էի տողերն իմ, որպես բեռ ահագնական,

Եվ նրանց ծանրության տակ սրտերակս բացվեց,

Եվ Մովսես կար այնտեղ…

ՀԱՎԵՐԺԱԿԱՆ ԸՆԹԱՑՔԻ ՄԱՍԻՆ

Ընթացքում տեղ-տեղ ջերմացիր, նորից ընթացիր…

ՄԻԱՅՆ

Օվկիանոսները` հայելիները Աստծո,

Կերակրամանները ջրային թռչունների...

ՀԱՄԱՀԱՇՏԵՑՈՒՄ

Յուրաքանչյուրս միևնույն արևի ընծայած ստվերն ենք արձակում...