ԶԳՈՒՇԱՑԻ'Ր

"Զգուշացի'ր: Մահացու' է: Սե'ր է:"
Գրեիր, կախեիր պատերից:
Իմ Հոգում արնահոս վերքեր են,
Ցավոտ են ավելի մահվանից...

"Զգուշացի'ր: Մահացու' է: Սե'ր է:"
Ախ, գոռում են աչքերդ հիմա:
Գոռան-չգոռան արդեն մեկ է.
Ուշացան, ուշացան, ուշացա՜ն...

Ռ.Խաստյան

ԷՔՍ
Գավաթս լիքն է պռունկե-պռունկ
Չասված խոսքերով...
Օտարների դեմ ստիպված բացվելուց
Ճռռոցը դռան աշխարհն է պատել...
Ծակվեց երկինքը հայացքից՝ վերև...
Էլ ինչքա՜ն լսեմ չսիրված երգեր...
Քրքի՞ջ է, թե ողբ,- ա'յդ էլ չգիտեմ՝
Մատյանում գրեմ...
Պռունկե-պռունկ գավաթս լիքն է,
Բախտս խմեմ...
Ռ.Խաստյան

ԿՈՇՏ
Հասկացողի'ն եմ ասում,-
Այսինքն՝ քե'զ,-
Ինչքան էլ ցինիկ լինեմ այս կյանքում՝
Գիտակցում եմ ես.
Կան ԱՐԺԵՔՆԵՐ:
Ու դրանք՝
Հավերժ են ավելի
Քան
Որևէ
Նորածին, նորընծա
Միտք երևելի...
Ըստ այդմ՝ հիշի'ր.
Նվաճումը քո... գուցե և դառնամ:
Ավարը՝ երբե'ք:
Ռ.Խաստյան

ՀԱՆԳՈՒՑԱԼՈՒԾՈՒՄ

...Մի քիչ շունչ քաշեմ
Ու անցնեմ նորից կարևոր գործիս,-
Թոկը մտքերիս հյուսեմ-վերջացնեմ
Խեղճ պարանոցիս...
Հանգույցը կապեմ,
Այնպիսի հանգույց՝ ոչ-ոք չքանդի,
Խառն ու գույնզգույն
Թնջուկը կյանքիս ու երազներիս:
Օֆ, շունչ քաշեցի,
Թոկը հյուսեցի, հանգույցը ստացվեց,
... Մորս ժպիտը
Մի ակնթարթում
Հանգույցը քանդեց...

Ռ.Խաստյան

ՀԱՆԿԱՐԾԱԿԻ ՄՏՔԵՐ

Կանգ առեք ուղտեր, բեռնված մտքով,
Ծանր է բեռը ձեր:
Իսկ անապատում մարդկային, անծիր՝
Չհասկացվելու ավազ է հոսում:
Հույսեր չկապե'ք օազիսի հետ,-
Տեսիլք ու պատրանք ձեզ շատ են խաբել,
Հավատացեք ձե'զ, թե կարողանաք,
Այն էլ՝ թողնելով մի փոքր կասկած...

Ռ.Խաստյան